پرەمەر-ءمينيستردىڭ ورىنباسارى بەردىبەك ساپارباەۆتىڭ استانالىق وبلىسقا جۇمىس ساپارى ىسكەرلىك ءارى جيناقىلىق سيپاتىندا ءوتتى. ول دەلەگاتسيا قۇرامىنداعى مينيسترلىكتەر مەن ۇلتتىق كومپانيالاردىڭ وكىلدەرىن ءۇيد باعدارلاماسىن ءساتتى جۇرگىزىپ وتىرعان «ەنكي» جشس كەراميكالىق كىرپىش زاۋىتىنا باستاپ كەلىپ, بۇگىنگى كۇنى وزەكتىلىگى ارتا تۇسكەن جۇمىسشىلاردىڭ ەڭبەك قۇقىعى مەن الەۋمەتتىك كەپىلدىكتەرىن قامتاماسىز ەتۋ ماسەلەلەرى بويىنشا كەڭەس وتكىزدى.
– ەلباسى ن.ءا.نازارباەۆتىڭ «نۇرلى جول – بولاشاققا باستار جول» جولداۋىندا العا قويىلعان تاپسىرمالاردى ورىنداۋ ماقساتىندا بىرقاتار ۇيىمداستىرۋشىلىق, تاكتيكالىق قادامدار جاسالۋدا, – دەدى ۆيتسە-پرەمەر ب.ساپارباەۆ. – قازىرگى داعدارىستى جاعداي ەل تىرشىلىگىنە دە اسەرىن تيگىزەتىنى بەلگىلى. الەمنىڭ كوپ ەلىن شارپىپ وتىرعان ەكونوميكالىق كەلەڭسىزدىكتەرگە توتەپ بەرۋ ءۇشىن ناقتى قام-قارەكەتتەر قولعا الىندى. سونىڭ ەڭ باستىسى حالىققا جۇمىس بەرۋ, جۇمىسسىزدار سانىن كوبەيتپەۋ, الەۋمەتتىك جاعدايدىڭ تومەندەۋىنە جول بەرمەۋ بولىپ تابىلادى. ەلىمىزدە ماڭىزدى 8 مەملەكەتتىك باعدارلاما جۇمىس ىستەپ جاتىر, سولاردىڭ ارقاسىندا 400 مىڭعا جۋىق جۇمىس ورنى اشىلۋى ءتيىس. مۇنىڭ بارلىعى ىشكى مۇمكىندىكتەرىمىزدى پايدالانۋ ارقىلى جۇزەگە اسادى. يمپورت الماستىرۋ, ءوزىمىز وندىرگەن ونىمدەردى ءوزىمىز پايدالانۋ, وندىرىستىك قۋاتتاردى ارتتىرا ءتۇسۋ تۇراقتىلىققا جول اشادى.
اقمولا وبلىسىنىڭ اكىمى سەرگەي كۋلاگين پرەزيدەنتتىڭ قاتىسۋىمەن وتكىزىلگەن بىلتىرعى تەلەكوپىرلەر بارىسىندا يندۋستريالاندىرۋدىڭ جاڭا قادامدارىنا وڭ باعا بەرىلگەنىن اتاپ كورسەتتى. ايماقتا 2014 جىلدىڭ قورىتىندىسى بويىنشا, بارلىق قارجىلاندىرۋ كوزدەرىن جۇمىلدىرۋ ارقىلى ەكونوميكاعا 181 ميلليارد تەڭگەدەن استام قارجى تارتىلدى. مۇنىڭ 70 پايىزى بيۋدجەتتەن تىس قارجىنى قۇراسا, سونىڭ 8,7 ميلليارد تەڭگەسى شەتەلدىك كۇردەلى سالىمدار بولىپ وتىر.
جۇرتشىلىقتىڭ جاپپاي ەڭبەك بەلسەندىلىگىن قالىپتاستىراتىن 36 مىڭ شاعىن جانە ورتا بيزنەس نىساندارىندا 137 مىڭ ادام جۇمىس ىستەۋدە. وڭىردە 2014 جىلى يندۋستريالاندىرۋ كارتاسى شەڭبەرىندە 17 ميلليارد تەڭگەنى قۇرايتىن يندۋستريالىق-يننوۆاتسيالىق 10 جوبا ىسكە اسىرىلىپ, 720 ادام تۇراقتى جۇمىس ورنىمەن قامتىلدى.
پرەمەر-ءمينيستردىڭ ورىنباسارى ب.ساپارباەۆتىڭ ەكونوميكالىق داعدارىسقا قارسى شارالاردىڭ ورىندالۋى, كالاچي جانە قوياندى اۋىلدارىنداعى ورىن العان جاعدايلارعا قاتىستى سۇراقتارىنا وبلىس باسشىسى مەن ونىڭ ورىنباسارى دۋلات نۇرمولدين ناقتى جاۋاپتار قايتاردى. اتاپ ايتقاندا, «كاماز-ينجينيرينگ», «ستەپنوگور تاۋ-حيميا كومبيناتى» جانە باسقا كاسىپورىندارىنىڭ ونىمدەرىن وتكىزۋ جونىندە ۇكىمەت تاراپىنان قولداۋ جاسالاتىنى, ال جوعارىدا اتالعان اۋىلداردا تۇرعىندار مۇددەسىنە ساي جۇمىستار ءجۇرگىزىلىپ جاتقانى ءمالىم بولدى.
كەڭەس سوڭىندا اقمولا وبلىسىنىڭ اكىمدىگى, كاسىپوداقتاردىڭ وبلىستىق كەڭەسى جانە كاسىپورىندار باسشىلارى اراسىندا جۇمىسشىلاردىڭ ەڭبەك قۇقىعى مەن كەپىلدىكتەرىن قامتاماسىز ەتۋ جونىندە ءوزارا تۇسىنىستىك پەن ىنتىماقتاستىق تۋرالى مەموراندۋمدارعا قول قويىلدى. باستاماشىلار اراسىندا «تىنىس» اكتسيونەرلىك قوعامى, «ستەپنوگور تاۋ-حيميا كومبيناتى», «ستەپنوگور پودششيپنيك زاۋىتى» اق, «التىنتاۋ-كوكشەتاۋ», «كاماز-ينجينيرينگ», «كوكشەتاۋ مينەرالدى سۋلارى», «ەنكي» كەراميكالىق كىرپىش زاۋىتى سياقتى جەتەكشى كاسىپورىندارمەن قاتار, رەسپۋبليكالىق ۇلتتىق كومپانيالار دا بار. ەندىگى جەردە 22 ميلليارد تەڭگەنىڭ 13 مەموراندۋمى قالىپتى تىرشىلىگىمىزگە وزىندىك ىقپالىن تيگىزەتىن بولادى.
باقبەرگەن امالبەك,
«ەگەمەن قازاقستان».
اقمولا وبلىسى.